Gemengewalen

Den Nelson Costa ass 42 Joer jonk a wunnt zu Recken.

Den Nelson schafft als Magasinier am service caténaire bei der Eisebunn. Hien ass gewerkschaftlech am Syprolux aktiv,wou hien sech fir seng Mataarbechter asetzt.
An senger Kandheet an als Jugendlechen huet den Nelson beim FC Marisca Fussball gespillt.Hien ass dann och weider am Fussball täteg bliwwen,an zwar nach 20 Joer als Arbitter.
Deemools huet den Nelson sech an d’Bierenger Jugend gemellt. An hien huet sech duerno och lokal an anere Veräiner engagéiert, e.a. bei der Amicale 5X Beringen wou hien haut nach aktiv ass.

Den Nelson kann een als Veräinsmënsch bezeechnen, an hie weess och gutt wat Benevolat hautdesdaags bedeit. Dofir ass et ganz normal, datt hien sech bei der CSV Miersch engagéiert huet. Mat senger Erfarung versteet hien de Veräiner hier Schwieregkeeten. An mat sengem politeschen Engagement kann den Nelson d’Mierscher Veräiner eventuell mat neien Iddien ënnerstëtzen.

De Michael “Mik” Engbork huet 60 Joer an ass 2003 op Rolleng geplënnert.

De Mik schafft fir CFL multimodal als Solution Delivery Manager an ass en trainéierte LEAN Six Sigma Blackbelt.
Hien ass 2009 bei d’CSV Miersch bäigetrueden an huet iwwer d’Joren e puer Mandater ugeholl. Hie war och President vun der CSV international, Member vum CSV Nationalkommitee a Nationalrot. Hien ass de Moment Member vun der Kommissioun fir d‘Informatiounsberodung an ass zënter 2011 President vun der Integratiounskommissioun.

Miersch ass säin Heem ginn an als Auslänner zu Lëtzebuerg ass hien der Meenung, datt et wichteg ass sech ze integréieren a matzemaachen, andeems een sech um demokratesche Prozess bedeelegt, fir all déi, déi hei wunnen, e positiven Ënnerscheed ze maachen.

A senger Fräizäit schafft hie fräiwëlleg beim Rugby Club Lëtzebuerg, wou seng dräi Kanner Rugby spillen, an ass am Kommitee vun der Lëtzebuerger Rugby Federatioun. Hien ass och e begeeschterte Filmemaacher a gëtt der Gemeinschaft eppes zeréck, andeems hie Videoen erstellt, déi lokal Sportsveräiner hëllefe méi Memberen unzezéien an d’Kanner motivéiere fir méi Sport ze maachen.
De Mik wunnt zanter 1997 zu Lëtzebuerg an ass amgaang d’Lëtzebuerger Nationalitéit ze kréien.

Den Heng Friederich huet 54 Joer, ass e Mierscher Jong a wunnt zënter iwwer 40 Joer zu Biereng. Hien ass 30 Joer mat engem Bierenger Meedche bestuet, dem Marianne Schintgen an huet e Jong vun 21 Joer.

Vu Beruff ass den Heng mat Läif a Séil Bréifdréier an dat aktuell zu Biereng an Essen.
A jonke Jore war hie vill an de Mierscher Veräiner aktiv, hei virun allem an der Musek, de Scouten, am Fussball a net ze vergiessen der Amicale 5x Beringen.
Lo wou säi Bouf de Bob aus dem Haus ass, ass rëm méi Zäit fir sech z’engagéieren a niewent dem Kiwanis wëll den Heng ënner anerem an der Lokalpolitik eng Hand mat upaken.

A senger Fräizäit geet den Heng gär Fussball kucken,mat deem gemeinsamen Hond spadséieren,a sengem Gard schaffen, an ass ee leidenschaftlechen Hobby-Kach.
Als Mann aus dem Vollek, deen all Dag mat de Bierger am Kontakt steet, ass et him wichteg, dass d‘Entwécklung vun der Mierscher Gemeng net stoe bleift, dëst am Aklang mat der Ëmwelt an dem Klimaschutz.

De Pascal Geisen huet 62 Joer, ass pensionéierte Geschichtsproff, bestuet mam Wolfgang Frank a säit 22 Joer an enger Bezéiung.

1997 ass hie vun Helsem op Biereng geplënnert. Hien huet am Lycée Technique zu Ettelbréck an am Sportlycée an der Stad enseignéiert. Hie war bei senge Schüler beléift, well et him wichteg war seng Schülerinnen a Schüler z’ënnerstëtzen.

Zu Miersch ass hie Member vun de Geschichtsfrënn vun der Gemeng Miersch, fir déi hie schonn u ville Publikatiounen an Ausstellungen deelgeholl huet. Ausserdeem ass hie Member am Kommitee vu Gaart an Heem zu Biereng a Co-Organisateur vum Klenge Maart zu Biereng. Hien ass den aktuelle Sekretär vum Kiwanis Club Uelzechtdall – Miersch. Do dernieft ass hien och Member vun der Mierscher Integratiounskommissioun  souwéi vun der Sozialkommissioun. Hien interesséiert sech staark fir sozial Themen aus allen Generatiounen. Hien ass President vun der Chancëgläichheetskommissioun.

An der Pensioun trëppelt de Pascal gär mat sengen 2 Muppen a Gesellschaft vu sengem Mann duerch d’Bëscher vu Miersch an Ëmgéigend. Hie schätzt nach ëmmer Geschicht a liest gär spezialiséiert Zäitschrëften, Biographien an historesch Romaner.

Gaardenaarbecht, Reesen an Asien, Dekoratioun, Thai Seid sinn e puer vu senge Liblingshobbyen.

D’Luana Gengler ass eng 21 Joer jonk Schülerin vu Rolleng bei Miersch.

Hatt huet seng Grondschoul zu Miersch ofgeschloss. Am Secondaire war hatt am Ufank am Sportlycée an duerno as et op eng Konschtsektioun an de Lycée des Arts et Métiers gewiesselt. Dëst Joer mécht hatt do säi Premièresexamen.

D’Luana ass uechtert d’Land bekannt fir seng sportlech Leeschtungen (Nationalkader am Karate Kader/Walfer) a regional bei de Scouten (Les Loutres Mersch).

Als talentéiert Athletin ass hatt mat der Nationalekipp vill international gereest. Hatt huet vill national a lokal Auszeechnunge fir seng athletesch Leeschtunge kritt, déi him déi néideg Erfarung ginn, fir kënnen an der Gemeng och am sportleche Beräich weiderzehëllefen.

A senger Fräizäit hëlleft hatt och fräiwëlleg bei nationalen an internationale Karatetournoien als Coach oder am Staff mat. Hatt kombinéiert gär Sport mat Natur a genéisst Spadséieren a Kloteren. E puer vu sengen anere Passiounen si Gestalten, Zeechnen an Design, déi hatt gären a senge Studien an der Architektur weiderféiere well.

D’Luana ass zilorientéiert, motivéiert an engagéiert.

Et ass him wichteg, datt jonk Iddie gehéiert ginn an datt d’Gemeng zukunftsorientéiert organiséiert gëtt.

De Fränk Kraus ass 29 Joer al, zu Miersch opgewuess a wunnt mat senger Fra zu Miersch.

De Fränk schafft als Assetmanager am Beräich vun den erneierbaren Energien.

Duerch seng Ausbildungen als Elektrotechniker, Elektrikermeeschter an duerch säi BTS an der Comptabilitéit an am Steierrecht leien him d’Themen Nohaltegkeet, wirtschaftlech Entwécklung souwéi Digitaliséierung vu Servicer zu Miersch um Häerz.

A senger Fräizäit spillt hie Basket beim Black Star Miersch a besicht och gären aner sportlech, kulturell a biergerlech Manifestatiounen. De Fränk ass motivéiert, fläisseg an oppen. Hien schafft pragmatesch a léisungsorientéiert.

D’Linda Lamri huet 45 Joer a wunnt säit 2008 zu Lëtzebuerg. Hatt ass mat sengem Partner a sengen zwee Kanner 2020 op Miersch wunne komm.

Hatt schafft säit 2001 am Finanzsecteur an huet entscheet, sech an der CSV Miersch z’engagéiere fir mat sengem Know-How zur Entwécklung vu Miersch an der Gesellschaft bäizedroen.

D’Linda ass engagéiert a sëtzt sech fir déi bedierfteg Leit an, an ass säit senger Kandheet am Benevolat täteg. Mat sengem Engagement bei der CSV Miersch wëll hatt sech fir seng Stad engagéieren an domat säi Beitrag zur Entwécklung vu Miersch an der Gesellschaft leeschten.

D’Michèle Lorang wunnt zu Rolleng, huet 56 Joer, ass bestuet a Mamm vun zwee Jongen an engem Meedchen.

D’Michèle ass Professer am Centre de Logopédie, dem Kompetenzzentrum fir Sprooch, Héieren a Kommunikatioun zu Lëtzebuerg. Hatt ass Formatrice um IFEN, dem Institut de Formation de l’Éducation Nationale, a begleet Enseignanten an hirem Stage. D‘Aarbecht mat de Schülerinnen a Schüler an d‘Zesummenaarbecht mat hiren Elteren a mam Léierpersonal ronderëm d‘Theme Sprooch, Léieren, Schoul, Erzéiung an Inclusioun gehéieren domat zu sengem Alldag. An dësem Beräich huet d’Michèle och promouvéiert; dofir ass dëst och ee Schwéierpunkt vu sengem politeschen Engagement.

An der Gemeng Miersch ass d’Michèle Member an der Schoulkommissioun an am Comité des fêtes. Als Presidentin vun der Informatiounskommissioun sëtzt hatt sech fir en einfachen Zougang vun alle Biergerinnen a Bierger zu Informatiounen zu villfältegen Themen iwwer villfälteg Weeër an.

Seng Fräizäit verbréngt d’Michèle mat Lafen a Liesen, mat Schaffen am Gaart a Genéisse vun der Natur.

D’Claudine MENDES ép. PORTELADA, huet 45 Joer, ass bestuet, huet 2 Kanner a vu Beruff ass hatt
Attachée à la Direction. Opgewuess ass d’Claudine zu Munneref a säit 2003 ob Miersch wunnen
komm.

Seng Hobbyen si Kachen, Baken, Liesen, ënner Famill a Frënn sinn a mam Hond spadséieren
goen. Als aktive Member vum DT Recken, hëlleft hatt do gäre wa Matcher oder Tournoie sinn.
Benevolat an als Team zesummen ze schaffen ass fir hat eng Selbstverständlechkeet.

D’Liewensqualitéit vun de Kanner, der Jugend an den Elteren an eiser Gemeng ass e ganz wichtege Punkt fir
d’Claudine, dofir huet hatt decidéiert sech politesch z’engagéieren.
D’Qualitéit vum Liewensraum limitéiert sech net nëmmen op en eegent Haus oder Appartement, mee bezitt sech och op
ëffentlech Plazen, en Treffpunkt an der Fräizäit, Gréngflächen, d’Zentralitéit, d’Diversitéit an d’Proximitéit.
Miersch soll attraktiv an esou positiv wéi méiglech an de Käpp vun de Leit, a virun allem och vun de jonke Leit bleiwen. Sie kënnen eng positiv Kraaft fir d’Entwécklung vu Miersch sinn.

D’Letizia Menei ass 57 Joer al, bestuet, ass ee Familljemënsch a Mamm vun enger 21 Joer jonker Duechter. Hatt huet och zwee adorabel Hënn. Hatt wunnt zanter bal 30 Joer zu Rolleng.

Hatt huet am Finanzsecteur geschafft. Hei war d’Letizia och an der Personaldelegatioun involvéiert als Delegéierte vun der Chancëgläichheet a Rettungsaarbechterin.

Als fréier Athletin a Mamm vun enger Spëtzesportlerin  war hatt bal säi ganzt Liewen am Sport engagéiert, sou datt et fir hatt kloer ass, de Sport an der Gemeng Miersch z’ënnerstëtzen. D’Letizia ass Member vun der Sports- a Chancëgläichheetskommissioun. Hatt ass Kommiteesmember am Karate Club Walfer a këmmert sech ëm déi technesch Finanze vum Veräin. Bis viru kuerzem war d’Letizia och Member vun der FLAM (Fédération des Arts Martiaux Luxembourg) an der Karatesektioun.

D’Letizia ass zënter 2022 pensionéiert, a ka sech elo méi op deem soziaale Liewen a senge Passiounen an Hobbye widmen. Hatt schätzt et an Harmonie mat der Natur ze liewen, mécht gär Gaardenaarbecht a Fotografie a genéisst et mat sengem Mann Marc an hire Muppen trëppelen ze goen.

Fir hatt ass d’Pensioun kee Grond fir stoen ze bleiwen, sou datt d’Letizia sech op vill Manéiere weiderbilt. Kierzlech huet hatt en Ofschloss an der Naturopathie gemaach an eng Formatioun fir 1. Hëllef an der mentaler Gesondheet.

De Romain Miny huet 67 Joer a wunnt zu Miersch. En ass bestuet a Papp vun 2 erwuessene Meedercher.

De Romain ass viru 6 Joer an de Gemengerot gewielt ginn. Hien ass e ganz sozial agestallte Mënsch. Hie kennt ganz genee d’Problemer vun eiser Gesellschaft an huet als President vun der Sozialkommissioun a vum 3. Alter zesumme mat de Membere vun dëser Kommissioun virun allem fir d’Besoine vun deenen agesat, deenen et net esou gutt geet. Desweideren ass hie Member am Fairtrade-Grupp vun der Gemeng a Vertrieder vun eiser Partei am Kommitee vum ZAMID (Zone d’Activités Mierscherdall). Hien ass och als Gemengevertrieder am Verwaltungsrot vum Mierscher Kulturhaus.

Mir liewen de Moment an enger komplizéierter Welt. Vill Leit sinn iwwerfuerdert a veronséchert, jo, an hunn och zum Deel Angschtgefiller. Hei gesäit de Romain seng Flicht doranner dës Leit z’ënnerstëtzen, an ee soziaalt Ëmfeld ze schafen, esou datt déi Leit net d’Gefill hunn ausgeschloss ze sinn. Hie versprécht net egal wat, mee setzt sech fir Saachen an déi ze realiséiere sinn an och noutwenneg sinn.

De Romain ass aktive Member am Syndicat d’Initiative et du Tourisme, an der Amiperas, wou d’Aktivitéiten déi lescht 3 Joer durch d’Pandemie bedéngt kräfteg gelidden hunn. De Romain ass doriwwer eraus och an engem Service Club engagéiert.

A senger Fräizäit liest hie vill an interesséiert sech fir modern Konscht.

Den Tim Reding ass e gebiertege Mierscher an huet 24 Joer. Hie mécht am Moment e Stage zu Paräis am Kader vu sengem Master 2 Droit européen op der Uni vu Montpellier, wou en déi lescht fënnef Joer studéiert huet. Do hat hien d’Chance am CELM (Cercle des étudiants luxembourgeois à Montpellier) kënnen aktiv ze sinn, dovunner och ee Joer laang als President.

Donieft war en zwee Joer laang Kommiteesmember bei der ANELD (Association nationale des étudiants luxembourgeois en droit) an iwwert ee Joer Secrétaire sportif am Tennis Club Miersch. Als laangjäregen aktive Member a Saxophonist an der Mierscher Musek ass en ausserdeem säit 2022 Coorganisateur vum Jugendstage, deen ee Mol d’Joer stattfënnt.

Fir d’Gemengepolitik leie seng Schwéierpunkten aktuell bei der Kultur, beim Sport a bei de Veräiner, well hien zu Miersch komplett zefridden opwuesse konnt an iwwerzeegt ass, dass dorun eng grouss Roll déi gutt Viraussetzunge spillen, déi et an deene Beräicher hei gëtt. Dofir wëllt en sech och elo dofir asetzen, dass dat weiderhi laangfristeg esou bleift an nach ëmmer weider entwéckelt gëtt, fir dass Kanner, Jugendlecher an Erwuessener gären a glécklech hei liewen.

De Michel Reiland huet 60 Joer, ass bestuet, Papp vun 2 Meedercher a wunnt zu Miersch um Lohrbierg. Vu Formatioun ass de Michel Sportsprofesser an hie schafft an der Ecole Internationale Anne Beffort zu Miersch.

De Michel ass säit 2009 am Gemengerot a säit 2012 éischte Schäffen an der Gemeng. D’Schoul, d’Kannerbetreiung, d’Jugend, de Sport, d’Kultur an d’Veräiner stinn, natierlech och duerch dem Michel säi Beruff, ganz vir a senge Prioritéiten. Do erstaunt dann och net, dass de Misch President vu Fit Kanner Miersch ass. Aner Ressorte sinn Informatioun, Soziales an den drëtten Alter.

Laang Zäit war Basket dem Michel säi Liewen. Hie war Spiller, iwwer 20 Joer laang Basketnationaltrainer, an hie konnt  hëllefen de Centre de Formation matzegestalten, d’Basketsinternat zu Miersch opzebauen an d’Weiche fir de Sportslycée mat ze leeën. Haut ass de Michel Responsabel fir d’Trainerformatioun a säit e puer Joer ass hie Vizepresident vun der Basketfederatioun (FLBB).

Als Vizepresident vum Naturschutzsyndikat SICONA weess de Misch, dass mer op eis Natur musse Récksiicht huele wa mer eis Gemeng weider entwéckelen. An dëser Entwécklung vun der Gemeng muss awer un all d’Bierger geduecht ginn, un di Jonk un di eeler Léit, d’Lëtzebuerger wéi d’Net-Lëtzebuerger. Dofir sëtzt hie sech weiderhi fir eng gerecht Politik no beim Bierger an.

Den Abby Toussaint huet 46 Joer a wunnt scho genee sou laang zu Miersch. En ass bestuet a schafft säit gläich 30 Joer am elterleche Betrib, deen hien am Joer 2000 iwwerholl an ausgebaut huet.

Hien ass säit 12 Joer am Gemengerot, dovun 2 als Schäffen. An där Funktioun huet hien sech virun allem fir Ëmweltthemen, Sécherheet an d’Schafe vu méi ëffentleche Wunnengen agesat.

Als President vum Ofwaassersyndikat SIDERO weess hien, wéi et ass en ëffentleche Betrib mat iwwer 80 Mataarbechter an engem grousse Budget ze leeden a fir d’Zukunft fit ze maachen.

D’Politik gesäit hien als Méiglechkeet der Gemeinschaft ze déngen an d’Entwécklung vun der Gemeng positiv ze beaflossen.

Dass hien am Organisatiounsteam vu Mir si Miersch ass, verwonnert dofir genee sou wéineg, wéi säin Engagement als President vum Syndicat d’Initiative et de Tourisme vun der Gemeng Miersch.

A senger Fräizäit engagéiert hien sech an engem Service Club fir defavoriséiert Kanner a genéisst mat senge Muppen déi schéin Natur an eiser Gemeng.

Den Henri Wagener huet 40 Joer an ass zesumme mat senger Partnerin virun engem Joer op Biereng geplënnert.

Den Henri ass vu Formatioun Ekonomist a schafft als politesche Beroder bei der CSV Fraktioun.

Hee fillt sech immens wuel an der Mierscher Gemeng a well duerch säi politescht Engagement dofir suergen, dass Miersch och an Zukunft eng flott a liewenswäert Gemeng bleift. Den Henri well de Wuesstem vun der Gemeng begleeden a sech drëm këmmeren, dass d’Infrastrukture fir de Sport, d’Kannerbetreiung an de Verkéier den Ufuerderunge vun de Bierger gerecht ginn.

Ausserdeem well hie sech dofir asetzen, dass déi nei Mierscher beschtens integréiert ginn, mat Hëllef vun der Gemeng an de Veräiner.

A senger Fräizäit reest a baakt den Henri gären, a geet gäre mat sengem Mupp an d’Natur spadséieren.